.
في ذات صباح التفتت حيوانات الغابه إلي هذه الصرخات المتتاليه والتي يشعر كل حيوان وكأنها تحت سريره الخاص ، يصيب الجميع الرعب فيهرعون ناحية الصوت يجدوا ان الأرانب البرية تحاول دخول وادي الجزر هروبا من بطش الحمير الوحشيه المخططه .
وعلي الجانب الاخر اتجهت انظار الجميع صوب تاريخ الغابه منذ سنوات ليست ببعيده ، هل لو كان الملك الاسد موجوداً- قبل ان يقتل بنيران احد الصيادين غدراً - كان هؤلاء الحمير استطاعوا فعل ما يفعلوه من جرائم اقل وصف لها بأنها حرب إباده لهذا النوع وتلك السلاله من الارانب التي سميت بالبريه نظراً لان الكل تركها تعيش وحدها وهجروها وأتبروا منها كأنها أبنة خطيئه ، الكل يتمني من هذا الحمار الابيض الذي اختير ملكاً للغابه عقب وفاة الاسد من قبل غالبيه الحيوانات الديمووحشيه والسبب في الاختيار لانه من قام بتنفيذ مخطط الملك الاسد في غزوته الاخيره لتحرير المنطقة الوسطي بالغابة من الحمار الوحشي ، وسبب كره الغالبيه الأخري التي تعتبر الاكثر عدداً - لكنهم الاقل صوتاً - له من حيوانات وديعة واليفة وشرسة ومتوحشة إنه جعلها بلا أنياب لأن الحمار قام بدس نوع من الجله في جميع أنواع الأكل اللي الحيوانات بتاكله مما أدي لإصابة الجميع بالتبلد وعدم الإحساس بالمسئوليه ونسوا انهم حيوانات شرسه يجب ان يخاف الانسان منها بل أصبح الامر علي العكس فهم الذين يخافون حتي من بعضهم البعض والسبب في هذا الحقد علي الحمار الابيض ليس فقط لأنه غبي ما يستاهلش كل ده لكنه كمان عامل فيها إنه أسد وزعيم للغابة - اللي طول عمرها بتتنكر للي زيه - ده كمان اول لما بيشوف الحمار المخطط بيقوم وياخده بالحضن ويقابل كل أفعال الحمار الوحشي اتجاه الارانب البرية بنوع من الرفض واستهجان مطبق مع هز ودان سافل ولو قام بهز الديل تفهم علي الفور انه بيعاني حاله شجب طاغيه لا تتعدي اكثر من الحدث لتعود مره اخري المصالح بين الحمير والخاسر الوحيد طبعاً هما الحيوانات الغلبانه الباقيه لانهم يا ولداه طول اليوم بينزلوا عزق وبيبعزقوا بعضهم علشان يجمعوا اكلهم ويجي هو علي الجاهز ياخد منهم كل اللي جمعوه في صوره حقوق مشروعة لتشجيع جمعيه الرفق بالحيوان والبحث عن حياه أفضل للحيوان الصحراوي في ظل التقدم الهائل والطفره الفظيعه اللي بتحصل في كل غابات العالم ولانه هو اول واحد عارف انه حمار بس بيحاول يبان في شجاعة الاسد أمام أهل الغابه ولأنه لا يريد أن يشعر بهبله بينهم إنه في الحقيقيه حمار بيتحكم في حيوانات اكتر حموريه منه .المهم انك أول لما تشوفوه بيضحك تفتكر علي الفور ابنه الجحش الكبير . نفس الشكل بس الجحش علي مودرن شويه رغم ان علامات الغباء طاغية وواضحه عليه أكتر .
يا ساتر الحمد لله إننا بني أدميين عندنا عقل ...! فعلاً الفرق اللي بنا وبين الحيوان إن ربنا وهبنا عقل نفكر بيه . المهم نرجع للقصه الغريبه اللي تشوف فيها ان الحيوانات رغم انهم حيوانات بيحاولوا يقلدونا إحنا البني ادميين ويعملو من الغابه دي حاجه كده زي جاردن سيتي ينزل القرد الصبح من شجرة الموز يلاقي الدب الأسود اللي علي شكل التوك توك في إنتظاره يقوم راكب علي ضهره لحد لما يوصل لمكان شغله وأكلة اللي مهما زاد هو عباره عن فتافيت - من اللي بياخده كبار نمور الغابه واسودها - في الجبلايه المخصصه ليه ، يقعد يتنطط ويلعب ويعمل فيها زعلان علشان الناس ترميه بالفول السوداني وقشر الموز وينزلوا ضحك وسخريه عليه وهو طبعاً مش عارف هو بيعمل ليه كده لانه حيوان مش بيعرف يفكر .
وفي الغابه شوية تفرقه ما بين الحيوانات مع بعض كل فصيله حيوانيه عايزة تعمل جروب لوحدها وعايزين كلهم ياخدوا بنفس الوقت اللي الكل عايز ياخد فيه ومش لاقيين حد يقولهم يا حيوانات لو كل واحد قعد وهاتك يا أخد مين اللي هيقدر يعطي ويلبي باقي احتياجات الحيوانات .؟ لكنهم اكتسبو الصفه التي خلقهم الله عليها واحترموا جيناتهم الحيوانيه وارتضوا أن يبقوا حيوانات لا تفكر .
نرجع بقي لموضوع الحمار الوحشي - اللي نازل سفك في الارانب- هو والسلاله اللي بيحاول يحافظ عليها من الأنقراض وبيحاول يلقي مرعي طبيعي يعيش فيه كل الحمير الوحشيه من أول حد الغابه الغربي حتي الحد الشرقي جوار نهر المالح .، وطبعاً بعد الصلح اللي تم بين الأسد المقتول اللي أرغم الحمير المخططه بالخضوع له وتلبية كل مطالبه حتي لا يفتك بهم مقابل ان يحظوا بالعيش بالجوار جنباً إلي جنب ، اصبحت وثيقه هذا الصلح بماثابة إعادة النسل مره اخري - بعد ان كانوا مهددين بالانقراض - ولأن الحمير الوحشيه ( المقلمه ) مقتنعه داخلياً بأن مكانهم الطبيعي جوه الغابه مش خارجها بيحاولوا علي استحياء إنهم يدخلوا واحده واحده حتي لو كانت الظروف تضطرهم إنهم يظهروا قصاد الكل بأنهم حمير سلميه من غير خطوط وليست من النوع الوحشي وان الارانب هي اللي غلطانه لانها كل يوم تيجي تسرق الجزر من الزريبه وتجري ، ووانهم اختاروا يكونوا حمير من غير خطوط - في عيون كل الحيوانات - لأن لو أخدت من قصادها التبن او البرسيم بتاعها تلاقيها هااتك يا نهيق .. بصوت عالي ودوشه لدرجه تجعل أي حد يصدقه ويحاول يساعد الحمار الغلبان من بطش الارنب العيان ويصعب عليك تقوم مرجع له تاني الاكل وتوفر ليه كل شيء يحتاجه .
المهم لما الغابه صحيت علي صراخ الحيوانات ووجدوا أن الحمير المخططين أرتكبوا أكبر مجزره وحشيه عرفتها الغابه وقامت بالهجوم علي وادي الأرانب البريه ، وفي ظل شجب مغلف بالحذر من الحمار الابيض ، في ظل موافقه واضحه من خلال استقبال الحمار الوحشي ومعه صديقه البغل الاتسوائي في أجمل وديان الغابه ، في ظل تبادل قبلات صريحه وضحكات عاليه بين الحمير ، في ظل إحتجاج داخلي غير مسموع من الحيوانات وبين هذا وذاك يظهر الحمار الأبيض فوق صخرته العالية ليؤكد لكل حيوانات الغابه إنه مازال علي استعداد أن يساعد جيرانة الأرانب البريه وإنه سوف يقوم بفتح باب الدخول لوادي الجزر الأحمر من قبل اي أرنب بيتوتي أو وحشي لكن ... عليهم أن يعرفوا أن هذا الشيء مجرد مساعده مؤقته لحد لما يلاقوا جزر يكفيهم ويعتمدوا علي أنفسهم ويلمو الشمل بين الارانب البيتوتيه والارانب البريه، وإلا سوف يتم غلق الوادي أمامهم وكمان سوف يجدوا رد سريع من قِبل الذئاب وليس من حق أي أرنب يقول عايز جزره لأن الجزره دي مش بتاعتوا .
يا إما الاختيار التاني وهو تحذير مني انا الحمار الابيض الكبير إني لو مسكت أي حيوان في الغابه هيجيب سيرة الموضوع بتاع الارانب ده أو سيرة الواد الجحش ابني الكبير هبهدله بهدله مشفاهش حيوان وقع في أيد صياد عربجي ، ولأن كمان الأرانب دي هي اللي غلطانه مش عارفين يحافظوا علي حاجه . كان فيها إيه يعني لو كانوا سمعوا كلام الأسد وراحوا معاه في قعدة النطح .. ؟ كان زمانهم دلوقتي قايمين نايمين شاربين داخلين الحمام مع بعض . وكمان مش عايز أي حيوان يجيب لي سيرة إننا من حقنا المغاره اللي هناك لأن المغاره دي من حق كل حيوان إشمعنا بقي عايزنا احنا بالذات وبالخصوص اللي نروح ندافع عن المغاره ..؟ أي حد هيجيب سيرة اننا من واجبنا الدفاع عن المغاره ونفتك بالحمير الوحشيه لأننا الأقوي في الغابه هقولوا برافوا يا حيوان إحنا ممكن نكون الأقوي بس احنا أخرنا ندافع عن نفسنا وبس ..! وحدود الغابه بتاعتنا وخلاص ...! علشان نقدر نحافظ علي الشجر والروابي المساحات اللي انا عملتها لكم يا حيوانات .. ولا انتم حمير عايزني أرفع سعر أي عود برسيم ممكن ياكله حد فيكم يا بهايم واخليكم كده تروحوا كل مكان تدوروا عليه ..؟
شو تختارو
