معاناة شاب كركي مخلص حاسوب
المعروف هاي الايام ، انه العالم يتجه اتجاه التخصص ، و التخصص العام ينتج عنه تخصص فرعي...
الا عنا الله وكيلكو ، ما دامك تبع تكييف لازم تكون تفهم بالدفايات اللي على الحطب و الجفت كمان...
مثلا انا اسم الله علي ، كومبيوترجي.
يعني معي كرتونة بعلم الحاسوب خلي مجمع اللغة العربية يكيف من نفسهم).
بيجي واحد من هالعائلة الكريمة بيحكيلك
- خد هالموبايل شوفلي اياه مالو بطل يشتغل .
- انت بتحكيلوا بعرفش...
بيطلع عليك من فوق لتحت و بازدراء شديد بيحكيلك ،
- انت مش دارس كومبيوتر ،
بتحكيله و انت فخور جدا ويا ارض اشتدي ما حدا قدي
- اها...
ساعتها بيفط الزلمة و بينتفض و بيحكلك و هو مبخوع
- وما بتفهم بالخلويات ؟ ، و ليش دارس كومبيوتر يعني ؟
طبعا في الموقف الزفت اللي انت فيه هدا بيتحاول تمسك اعصابك و تجمط حكي الزلمة و تحاول تفهمه انو انا مش
شغلتي اصلح خلويات و انو انا زيي زيك بهالشغلة يا شوال .
ساعتها بينتفض مرة تانية الزلمة و بيخلي الفضيحة بجلاجل ، و بينادي ابوك و امك و العائلة كلها و اهلك بيكتشفوا
انك متخرج من الجامعة بالواسطة ،
و بالاخير بتطلع حمار من بعد ما هالزلمة الشوال اجا سألك ليش موبايلو مش راضي يشتغل ( اي لا عمره لا اشتغل يا زلمة )
و اللي بيجي يسألك عن الساتالايت تبعوا بطل يجيب القمر الاوروبي ( ما شاء الله حوله و حواليه مهو بيفهم الماني طلياني)
و اللي بيجي يحكيلك
- جبت كومبيوتر جديد للولاد و يا اخي شكلو ضاحك علي الزلمة ما بيشبك انترنت الجهاز.
طبعا انت بتفرد عضلاتك و بتروح تشوف الجهاز ليش ما بيشبك انترنت.
بتكتشف انو الزلمة ما عندو خط تلفون من اصله ، و لما تحكيله هيك انو لازم خط تلفون عشان يشبك بيحكيلك
- مهو ابن عمي شابك لاولاده و ما عندو تلفون .
انت بتجاوب
-مستحيل يا زلمةّ!!!
في هذه اللحظة بيصير يحلفلك ايمان و حالتو حاله انو والله شابك و ما عندو خط تلفون
طبعا انت هون بتصير تحكيلو هادا ساحب من جارو كونكشن ال دي اس ال....
ساعتها بيحكيلك طب اشبكلنا اياه على دي اس ال هاظا... انت ساعتها بتفقع و تكفهر بس برضو بتكتم غضبك
( شو يا زلمة شايفني معي مفتاح مواسير و شد وصل بدي اشبكلك اياه ).
او لما نتائج التوجيهي بدها اسبوع لحد ما تطلع ، و انت تكون قاعد بامان الله على الفيس بوك بيحكي معك واحد بيحكيلك .
انت عندك انترنت صح
بتقلو اها ، بيحكيلك طب خد هالرقم شوفلي اياه بتقلو على راسي
و بتسكر الخط ، بعدها بخمس دقايق برجع يحكي ،
- ها شفتلي اياه
طبعا انت بيرتفع ضغطك و بتقلو مهو لسه النتائج مش طالعة هو بحكي اها طيب شكرا
و لما يكون النتائج بدها تطلع دارك بتصير غرفة عمليات و تلفون رايح و تلفون جاي و الناس تتوافد عليكو
- اها شو صار
انت بتحكي و بتغلي من جوا
- لسه
واحد بيجي يتفلسف
- مش انت دارس كومبيوتر
طبعا انت و الشرار بنط من عينيك
- اها
و ساعتها بيبلش الغمز و اللمز ، ليش مش عارف تشوفهم ، دارس كومبيوتر بيقولو.
يعني يا زلمة الله يلعن ابو اليوم اللي درست فيه هالتخصص الزفت عشان واحد شوال زيك يحكيلي هيك
يعني شايفيني امين عام الوزارة و الا وزير التربية و مخبي النتائج
و كلو كوم و لما تطلع النتائج كوم ، اذا واحد من هالنضوات مش مزبط او راسب لا سمح الله بتصير زي غراب البين ، يعني فوق ما انك متغلب و مطلع النتيجة كمان بيجكيلك بالله عليك هي ( زي كأنو بيني و بينو مزح ، بمزح معو انو ابنو راسب )
___________________________________________________________
و اخيرا ، بتكتشف انوانت بني ادم ما بنفهم شي ، لأنو الشوالات اللي قدامك بسألوك شغلات انت مش شغلتك تفهم فيها بس خلص بما انو معك شهادة او بتشتغل بالمجال الفلاني لازم تكون تفهم بكل ما يمت بصلة من قريب او بعيد للمجال الفلاني تبعك
و بنصير بالاخير ، سبع صنايع والبخت ضايع مع شعب شوالات زي اللي هون
****************************************
