اول حاجة "معلش يا جماعه علشان انا مبتكلمش العربية الفصحى علشان مبعرفش اشرح الي عايز اقوله صح بيها" .. ومعلش على الطريقة المباشرة الصريحة الي هتكلم بيها
طبعاً كلنا شايفين "هواية" عمل المنتديات الي انتشرت اوي السنوات الحالية وطبعاً اقصد بإنتشرت انها إنتشرت عندنا في الشرق الأوسط وممكن معلش احدد اكتر شوية "الخليج العربي" .. وبرضه بقيت الدول فيها نفس النظام .. يا جماعه الموضوع ده بس توعيه مفهوش اي تجريح ولا اي حاجة ويا ريت تفهموني بالطريقة الي هيا قصدي اتكلم بيها وبرضه يا ريت تكملو الموضوع علشان تفهموني اكتر.
طبعاً بنشوف منتديات Vbulletin كتير وممكن يكون صاحبها عامل تبعها (دليل - موقع "عبارة عن واجهه" - مركز العاب - مركز تحميل - مركز رفع - شات - سكربتات مجانيه)
وطبعاً صاحب المنتدى ده بيكون دافع فلوس في الدومين والاستضافه وبيقعد بالساعات علشان يظبط الارشفه وفي الاخر يطلعله ارشفه سوبر .. بس ايه بقا بعد كل ده "زوارة مبيعدوش الـ1000 زائر في اليوم حتى" والله انا بشوف منتديات زوارها في اليوم "2000 بالكتير" واشوف "اكبر عدد زوار في يوم --/--/---- كان 4000" طيب ده يعتبر نجاح ؟
ليه منستثمرش فلوسنا في حاجات صح .. في افكار جديده مثلاً ؟
طبعاً متأكد بنسبه كبيرة ان هيجي حد يقولي (نجيب افكار منين؟) نقطه مهمه برضو .. طبعاً كلكو عارفين اني هقولكم * احنا العرب فينا عاده الكسل ومبنحاولش ندور على افكار والكلام ده "
طبعاً لأ, احنا فينا نوابغ .. وفينا عباقرة .. بس المشكلة هي التطبيق .. انا من رأيي ان بدل ما يكون استثمار الفلوس في منتدى واستايل وسكربتات وغيرو .. يكون في عمل سكربت جديد .. واظن فيه ناس كتير فاهمه في البرمجه وقادره انها تعمل افكار جديده .. ممكن الي عندو فكرة ينشرها ويتم الطلب من مبرمج حتى لو مش عربي يعملها وياما فيه ناس سهل يعربو السكربتات وكده وحتى لو المستثمر ده فلوسه متكفيش ممكن 2 او 3 يتم ضم فلوسهم مع بعض ويتعمل المشروع .. مثلاً جوجل كانت فكرة طالبين في جامعه ستانفورد .. وطبعاً كل مشروع وبيطلعله ارباحه ومكاسبه .. بس مع "التفكير" .. واضمن ان الارباح هتعدي السعر باضعاف مضاعفه, بس طبعاً اخر حاجة نفكر فيها الأرباح .. في الأول قبل كل حاجة نفكر في المحتوى والفكرة.
وانا مبقولش منعملش منتديات .. حتى لو منتديات بس بأفكار وبهدف معين .. حتى لاحظو معي فيه منتديات ناجحه زي ترايدنت [مجال التطوير مواقع ومنتديات] وبرامج نت [برامج] والمشاغب [برامج وتطوير] وغيرهم من المواقع ذات الاهداف.
يا جماعه انا ترددت في عمل الموضوع ده والله .. بس الله اعلم بنيتي .. اتمنى فكرتي تكون وصلت
وجزاكم الله خيراً ~