هل لديك مشكلة في توفير راتبك ؟؟؟؟؟

يسلمو يا الورده الحمراء على الموضوع الي عنجد حلو كتير

بس انتي بتحكي انو حدد الضروريات يعني شيل فلوس الشغلات التالية

اقتبـاس ،،

مصاريف ايجار المنزل - مصاريف المعيشه - مصاريف الهاتف , الكهرباء , - مصاريف الصيانة ( المنزل - السيارة ) - مصاريف الابناء -

او حدد الضرريات الي حكيتيها في الاقتباس طيب بالله عليكي خلينا نحسبها

ايجار منزل اقل من 110 دينار مافي يعني غرفه ومنافعها متل ما نحكي
بعدين مصاريف معيشة خليها اخر شي
مصاريف الهاتف بدو التلفون احكي الارضي مع الموبايلات 30 دينار كحد ادنى
مصاريف الكهرباء يعني فاتورة الكهربا في جزء مقطوع يعني لابد منو وجزء الاستهلاك مع الملاحضه انو ثلثين الفاتورة ما الو علاقة بالكهربا بس المهم احكي بدك 15 دينار
بدك فاتورة مي احكي زي الكهربا بدك 15 دينار
صيانة المنزل والسيارة لنعتبر انو ما عندك سيارة بس ما بتعرف شو بيجيك كل شهر ممكن ينكسر شباك ممكن تخرب الثلاجة ممكن اي شي يعني مصاريف صيانة ما بدنى نبالغ احكى كحد ادنى من الادنى 10 دنانير
مصاريف بناء طبعا لنحسب انو المواطن ما بدو يبني بدو يضل ببيتو بدو يضل متشنطط بالاجار لانو بالعقل هلا ما في حد بيقدر يعمر المهم ما بدنا مصاريف العمار
مصاريف المعيشه هون الكارثة
يعني مش عارف الواحد صار اذا مشتهي طبخة بدها ميزانية لحالها يعني مصاريف اكل بس بدك شي250 دينار هاي للاكل بس لانو متل ما بنعرف صرت تدخل على المؤسسة تطلع بتلات كياس ب 50 دينار بتدخل على السوق بتشتري خضار ولحوم ومنا عارف شو بتطلع ب 35 دينار بتدخل بدك تشتري لبسة تلبسها طبعا هاي كل ست شهور بتطلع ب 50 دينار يعني 250 دينار هاي بتعيش بالاكل مستور والحمد لله
وبدكك مصاريف شخصية للاولاد والطلعات وللمواصلات والمناسبات بدك كمان شي 70 دينار كمان كحد ادنى من الادنى

لنجمعهم ونشوف
110+30+15+250+15= 420 دينار

طيب بالله عليكم الشعب عنا متوسط دخلو او اغلبو 250 دينار راتب احكي يا سيدي 300 دينار راتب متوسط للمواطن الاردني طيب ومن وين يجيب الباقي
طيب هيك طلع مكسور ب 120 دينار
طيب لنشوف شو بنقدر نشيل من المصاريف مع العلم انو احنا بنحكي هيك بدون ما يكون عند المواطن سيارة واحنا بنعرف انو شبة كل مواطن عندو سيارة لنشوف شو بنقدر نشيل

الاكل بنقدر نشيل منو شو رايكم قولو بنكسر بخاطر الاولاد بلا ما نوكل لحمة ولا سمك ولا فواكة احكي بدنا 200 دينار
صار عنا مجموع العجز 70 دينار
شيل من المصاريف الشخصية الي هية بالاصل 70 دينار شيل عشرين دينار بيصيرو 50 دينار يعني مجموع العجز صار عنا
50 دينار
طيب قول اقتصدنا بالكهربا والمية صرنا ما نشغل كهربت كل البيت نشغل بس الغرفة الي احنا قاعدين فيها وطبعا هاد مستحيل لانو في عندك واحد نوجيهي بدو غرفة لحالو وغرفة الكمبيوتر بدها واحد على الكمبيوتر ما بتقدر تمنع اولادك عنو وقول والثلاجات ريحها المهم اخذنا من الكهربا والمية 10 دنانير
طار العجز
40 دينا ر

طيب بشو نقتصد كمان

مع انو عندك الشتوية
يعني الشتوية لحالها برايكم قديش بدها مشان ندفى ما بدك كاز او غاز طيب جرة الغاز صارت ب 10 دنانير طيب انسى بدناش ندفى يا سيدي بندفن حالنا بالحرامات جعل لا حدا دفي خلي الكل يموت من البرد بس برضو يا اخي كلو حكي ما بيطلع بايدك يعني مجبور الواحد مهما يتحايل على حالو انو ما يشغل المدفئة ما بيقدر قول بدك جرتين غاز كل شهر وحده للغاز ووحده للصوبة هاي عشرين دينار بس احنا ما بدنا نحسبهن لانو الشتوية اكمن شهر


يا جماعه مو زابطة معي

برقعها من هون بتنخزق من هون

بلف عليها من هون بترجعلي من هون

مثل الي بيرمي كرة قدم على الحيط وترد ترجع عليه

طيب شو نعمل

طيب انا عندي عجز مهما اختصرت عندي عجز

انا بدي اصلح معلوماتك يا انسة ورده انتي طلع عندك نتيجة غلط انتي نتيجتك انو بيطلع توفير بنسبة 30%
ولكن المعلومه الي توصلتلها او الصحيحة وعلى الواقع وعلى حال المواطنين لانو انا مساعدهم بشرحي كمان المهم
على حسابك بيطلع المواطن مكسور ب (-30%) هاي النتيجة الي توصلتلها
[SIZE=4][/SIZE]
طيب الناس كيف عايشة فهموني

انتو بتفكرو انو كل الناس بتوكل لحمة وجاج كل شهر

احنا عايشين بالف نعمة وخير يا جماعه

في ناس بيوكلوالدجاج كل شهر مرة وحدة وصارلهم اكتر من ست شهور ما ضاقو اللحمة احكيلكو

والله العضيم في ناس ما بتعرف طعم اللحمة غير بعيد الضحية

وفي ناس ناسية طعم اللحمة



اااااااااااااااااااخ بس شو بدي احكي

صدقوني لو اضلاحكي من هون لبكرة ما بخلص حكي

على العموم يلا لنشوف ناقشو الموضوع لنشوف شو بدو يطلع معنا اراء وحلول


شكرا على الموضوع يا ورده انتي

يسلمو كيتر