اضحك يا محترم ..على إيش هالكشرة ..عاقد الحاجبين وماشي كأنك من عرب ( الشيخ هَمَر ) ..وَلكْ هَمَرْ إللي يهمرك ..استحي على حالك شوية : إنت ما وصّلت درجة بسكليت .. ،، شو في إشي يخليك شايف حالك وكأنك عنتر زمانو ..إنت لا عنتر ولا زمانو ..عنتر راح وترك الجراح ..وزمانو للي خانوا ..فاضحك يا شارب في حالك مقلب : أنت يجب أن تكون ضحكة وبس ..لأن عرب (الشيخ كُحلة) بطّلوا يشّوفوا ولا حتى يتقابلوا على العين .. ،،
اضحك وَلَكْ ..خلّي الضحكة تعبّي ثمّك ..لأنو أمّك : ندمت على اليوم إللي خلفتك فيه ..وكل الناس تجيب في سيرتك شمال و يمين : وما إلك عليّ يمين إنو الحكي غير الحكي : بس شو بدك تعمل : عرب ( الشيخ لسان ) ما ينبل في إثمامهم فولة ..وحكوا لعرب ( الشيخ آذان ) : وهاظول يا خوك بس بدهم كلمة عليك ..وانتشر الخبر وصارت كل العربان تحكي فيه : عرب الشيخ دحدول وعرب الشيخ مشط وعرب الشيخ ناشف وعرب الشيخ طاخ طيخ ..حتى عرب الشيخ أخرس على دورك صاروا يحكوا .. ،،
اضحك وَلكْ ..لا تستمتع بقهرك ..القهر قهر ..والقرف قرف ..و العوج عوج ..حارب الجميع بالابتسام ..ورّيهم إنك ولا هامك ..وإنك جبل مهما مرّت عليه إرياح .. ،، ولَكْ اضحك ..وخلي ضحكتك مجلجلة ..لا يهمك فاتورة ولا بندورة ..إنت خُلقتَ تناسب كل الفواتير وكل السحارات ..أنت ضد الارتفاع ..بل أعلم أنك ضد الكسر : أتعلم لماذا أنت ضد الكسر ..؟؟ لأنو ما ظل فيك إشي قابل للكسر : كله إنكسر من زمان ..فاضحك يا من أتلفت نفسك بالتشاؤم وابدأ حياتك مع عرب (الشيخ فرفش ) .. ،،
شعار اليوم الانتخابي : أعدكم بمحاربة الكشرة قبل الفاتورة وبعد الفاتورة.. ،،
للامانه منقووول
بقلم الاستاذ كامل نصيرات
بقلم الاستاذ كامل نصيرات
