8411

مرحبآ



اول ما فتحت المنتدى قبل اكمن يوم / ما لقيت ولا صفحة خاصة الي
مع اني كنت كاتبة كم منيح ْ~
بس قدر الله ما شاء فعل ..

نبداً من جديد ..

اول ما بديت اكتب ما عرفت شو احط عنوان للصفحة / كنت بدي احط نسيم الشمال زي قبل
بس بعدين حكيت ( مستهلك )
هو احكيلكم شغلة /
دائماً التمييز في البساطة خصوصاً حالياً

يعني مثلاً لما بروح على حفلة ( نادر جداً )
بكونو كل البنات زي العروس .. احياناً بحتار اي وحدة فيهم العروس ~
طبعاً السبب انو كل وحدة بدها تكون مميزة ( الهدف واحد )
بس المشكلة انو الكل استخدموا نفس الوسيلة عشان يوصلو للتميز

_( الغاية وحدة و الوسيلة وحدة )_

وهيك بصير كل البنات مميزات بنفس الطريقة
يعني التميز صار النمط السائد / التميز ما عاد تميز صار حالة طبيعية
والبساطة صارت غير عادية ..
وهاد اللي بخليني بسيطة في كل اشي
ونفسو خلاني اختار 8411 كاسم لموضوعي ~





والخلاصة / التمييز و الابداع شغلة نسبية يحددها المحيط

لما اجيت بدي احط عنوان الموضوع رقم العضوية

دخلت على ملفي الشخصي مرتين واشوف مشاركاتي . واحفظ الرقم وحالتي حالة

باختصار عندي مشكلة / او مرض اسمو :
فقدان الثقة بالنفس ..

انا عارفة انو السبب اللي صارلي عالفصل الاول بالتوجيهي .. انتكاسة شنيعة
اثرت علي بشكل كبير حتى بدأت تنقصني انفاسي

يعني صارتلي اشياء فظيعة بس لأني ما عندي ثقة بنفسي ..
كيف اعالج المشكلة ما بعرف .؟

برجع بحكي شو صار فيي بعدين لأنها بدها قعدة مع حالي ..

انا الآن في وضع سيء ~

ما بدي احكي مع حدا ولا حدا يحكي معي
اصلاً ما في حدا ..

يعني صاحبتي طلعت شريرة ..
حاسة حالي بأفلام كرتون .. بنكون عايشين سعداء ومبسوطين
وفجأة بطلعو اللي حوليك مخادعين وأشرار وبحاولو يدمروا العالم

بتكون مخططة لشغلة من سنين وبعدين بتنمنع من ابسط حقوقك
وبصير كل اشي لازم تعملو خاوة وغصب
وبس تطبق اللي بدهم اياه بتكتشف انك انت مش انت ..

يعني يا بترضيهم وبنسم بدنك
أو بتسم بدنهم كلهم وبترضي حالك ~



انا اخترت ارضيهم .. هيك الدنيآ

هاد اول مبارح انا ما نمت كالعادة من لما خلصنا توجيهي وانا بنام باليوم ساعتين ..


وصار امبارح الساعة 5 الصبح وانا لسه صاحية / نمت وصحين عالسبعة ونص
كان ابوي طالع عالمدرسة يجيب النتيجة ..
وانا على اعصابي / حتى الحمام ما قدرت اروح عليه

ضليت امشي بالبيت واسأل امي متى النتائج ؟ ومش عارف ايش ؟ وطولو ؟
وادعي ربي كمان /
كان عندي 3 خيارات متوقعيتهم

والا الساعة 8 والسيارات بتزمر .. اجا ابوي وهو بزمر كمان
حكيت يا سآتر ..

دخل البيت بحكيلي معدلك ****
ويساوي اقل توقع توقعتو ..

انصدمت وصرت ابكي واللي بدو يشمت شمت ..
والا جدتي جاية عنا .. شافتني بعيط راحت دمعت وصارت بدها تعيط
راحت امي حكتلها لا المعدل هيك ****

قال انبسطت هي وكلهم مبسوطين إلا انا .. والله انتحرت
يعني من يوم ما دخلت التوجيهي ما طلعلي يوم انبسط فيه
خلص .. ربنا عدل

شكلي بستاهل .!.

..

للآن وضعي زفت ..

ياريت وقفنا على هيك .. اجت عمتي وعمي وبلشو الناس ييجو واحد واحد
انا ما بدي اشوف حدا ,, والناس ما برحمو ~
وخالتي كمان ..

وعملولي حفلة بالخآوة
بس ما خليتهم يحطو أغاني ولا نجاح ولا وطني ولا عادي ولا اسلامي كمان
كل هالناس قعدوا وصبتلهم امي قهوة سادة زي العزا لا سمح الله
وقعدوا يسولفو مع بعض ..منيح اللي جمعنا عيلتنا مع عيلة امي

بس كانت حفلة بتضحك شوي ..

احكيلكم شو صار //

اجا حوالي 100 وحدة أو اكثر بس انا قدرت العدد حسب سعة المجلس
غير عن الصغار .. والرجال ما بعرف لانو ما شفت

البيبسي والعصير بالاول ما كفى / بنحط بالتلاجة وما بنلاقيه
بس انا سمعت ولد صغير بحكي شربت 4 لهسه !!!
وفي بنت صغيرة كمان بحكيلها روحي جيبيلي عصير وما بترجع
وولد صغير قاعد جنبي كل ما افتح اشي بشرب منو شوي وبحطو عالطاولة
برجع بدي اكملو ما بلاقي العصير ولا الولد ..

لما رحت ادور على اختي لقيتها بتصب بيبسي للبسس
هاد غير عن الولد اللي كان مخبي ببلوزتو ..

..

انا بحكم انغلاقي عن المجتمع ما بعرف حدا !
والحضور ما في حدا من عمري او بعرفو عير امي وخالاتي وعماتي وجدتي
قال في وحدة بتطلع علي بتحكيلي كيفك ؟
بحكيلها الحمد لله ..وحكتلي مبروك ومش عارف ايش ّ!
بتحكيلي عرفتيني ؟
بحكيلها لا والله مين انتي ؟
بتحكيلي انا مرت محمد ( زوجة محمد )
انا صرت اضحك : نعم يختي مين محمد ؟
( انا مش عارفة يعني حتى لو بعرف محمد انو محمد كل الناس محمد (..
صارت تشرحلي: ما بتعرفي محمد هو محمد ابن ابو مش عارف مين اخو سالم خال مش عارف شو هيه
المهم اختصرت على حالي وحكيتلها آه عرفتو .. اهلين تشرفنا ~!!_

بحكي لحالي لو عملت هيك من اول وتريحت منها ~

..

رحت عند ختيارة بلكي طلعت خرسا
والا هي الله لا يوريكو قديش برامة : يا بنت ليش ما في اغاني
يا بنت حطيلنا وطني يا بنت يلا هيك صار عزا ( لا سمح الله

صرت احكي اي كلام المهم نفدت
بعد شوي اجا ولد صغير كتير عند هاي الحجة
حطتو بحضنها وصار ( يبزق..
وبتلاعب فيه _ اعوذ بالله !

انا اجيت بدي اجامل ( على اساس اني بعرف اجامل يعني !
يبحكي للمرا مين هالولد الحلو ؟
حكتلي //::





















هاد ابن محمد

انا انصدمت وبلشت تطربني عاد : محمد ابني .........الخ

طلعت الحجة هي راس البلوة ~!! أم محمد ~!!

...


اعوذ بالله من هيك يوم ~


..

غير عن النكد اللي عملتو بالصالون
انا بحياتي كلها رحت مرة عالصالون ~
قبل 8 سنين يمكن ..

ما بحب الزناخة ولا السشوار ولا شد الشعر ولا اشي
وما بدي اروح بس خاوة سوبر أخدوني
المرا كانت تعمل شعري وانا بعيط : اتركيني وخلص وبكفي !

ما تحملت / قعدت ساعتين كل اللي عملتو سشوار !
انا هيك مبسوطة بالسشوار عجبني ِ
بعد شوي اتصلت خالتي / بتسأل شو عملت ( نسيم بشعرها ؟
حكتلها ..
راحت حكت للمرا تبعت الصالون .. لا ارفعيلها اياه !

صارت ترفعو وتنكش ومش عارف ايش .. بدون ما تسألني

طيب يا ناس هاد شعري !!
وصرت اعيط ..
راحت المرا تحكي خلص خلص لا تبكي هي فكيتو ..
وفكتو ..


يعني ولا اشي زي ما بدي
حتى الفستان مش زي ما بدي


.. لا اله الا الله ..

يا رب ما اضطر اعيد التوجيهي ~