قصيدتين للشاعر طلال السعيد (قالت بدو +مناحي)

قصيدتين للشاعر المبدع طلال السعيد (قالت بدو )و(مناحي)


وقالت بدو

صدت وقالتها بقرف

بنت الاكابر والترف
متكبره متعاليه يعني بدوي يقعد طرف
قالت بدو
والمعنى دون المستوى
ماحنا وياها سوى
حنا بنظرها من نكون
ريشه يطيرها الهوى
بمفهومها حنا عدد
رقم ولا اكثر بعد
يعني مجرد تكمله والا هي اصل البلد
قالت بدو
تعني صفر على الشمال
هذا على احسن احتمال
تصدر حكم ماتلتفت تحكم ولاتترك مجال
قالت بدو
متصورتني بستحي واترك مكاني وانتحي
تفاجأت تغيرت تلعثمت
ماتدري اني بفتخر لي الفخر

حنــــــــــــــــــا بــــــــــــــدو

حنا عمى عين العدو حنا البداوة وضعنا
واهل الوفا هم ربعنا حنا نتفاخر بأصلنا يابنت هذا طبعنا
ماهي بداوة تلفزيون والا مسلسل اردني
بس بدوي بالمكريفون ولاهد سيفه ينثني
والا بدو بيت السدو
حنا البدو
حنا بداوتنا الاصل
بالقمه حنا مو اقل
حنا بداوتنا تراث
من جيل لي جيل انتقل
حنا معاني ساميه
نروي السيوف الضاميه
نرد المنايا مانهاب لو هي سعاير حاميه
حناالبدو
حنا البداوة عيدنا
ماناكل الا صيدنا
مانعيش عاله مجتمع نموت مانمد ايدنا
حنا البدو
حنا البداوة بدمنا
مانسمي احد عمنا
حتى و لو هو منهو يكون
لوهو زعل ماهمنا
حنا البدو
حنا البداوة عمرنا
محد بيصبر صبرنا
لانها مصنع رجال
نمشي وتمشي بامرنا
حنا البدو
حنا البداوة اصلنا
وحنا البداوة فصلنا حنا بدو متماسكين
وهذي نتيجه وصلنا
يابنت ياللي تضحكين
قلتي بدوي تستهزئين
غرج لباسج الاجنبي
والمشكله ماتعرفين ان البدو
اصل العرب
تبغين هالكلمه طرب
صارت نشب
ياانسه
ياعانسه
ياضايعه ومستانسه
ياتارسه وجهج صبغ ياتارسه عينج شدو
حنا البدو
ولو كان قلتيها بقرف
لنا الشرف
حنا البدو
حنا بداوتنا شيم
دين وقيم
طيب وظفر
معنى كبير مااظن مثلج يعرفه
لو تدعين المعرفه
شي عسير مااظن مثلج ياصله
صعبه ولاهي حاصله
كلمة بدو
تعني التمسك بالجذور ماهو التخلف والجهل
والا بعد حب الظهور والا التنكر للاهل
كلمه بدو
تعني شمم
فعل وكرم
مبدا حضارات الامم
حنا القمم
نار على راس العلم
يشهد لنا سيف وقلم
وان جان ماعندج خبر
لنا الفخر
لو عشنا ببيوت شعر عيشة الم
عيشه فقر
عيشه تعلمنا الصبر
مانقترض لاجل السفر
ونحسب ايام الشهر
مانفترض ونعيش واقعنا بحذر
وبالضيق نرخص بالعمر
نشرب من الماي الهماج ونكحل نواظرنا بعجاج
وغسيلنا حفنة رمل
هي الدوا وهي العلاج
عيشة رضا
ماهي نكد
مافيها تعقيد ابد
ساعات مانلقى ذرى يكفي نتلحف بالنجوم وفراشنا رمل الثرى
وسراجنا نور القمر لامن ظهر
وننام من عقب العشا ونصحى قبل وقت الفجر
نؤمن بقضانا والقدر
ماهو كسل
والا نعيش بلا امل
نملك طموح
علم وامل ونرعى الابل
ونرعى الغنم
ونعزف من الونه نغم
ونتابع اخبار المطر وندور الروض الخضر
ونسري ورى برق سرى
ولانتراجع للورى
ونبحث عن المرعى العشيب
ومن شعيب الى شعيب
مانستقر
عنوانا كل الديار تجوالنا ليل ونهار
نعيش عيشه هاديه
وهذي حياة الباديه
سنة الربيع سنة دهر
ورغم الفقر
نخاف من قولة افا
ونتعب على قوله نعم
ونعيش عالين الهمم
من فضل ربي مانخون
نرعى الذمم ونركض ونتعب مانمل
ماحنا مثلج لا شغل ولا عمل
ماغير بس اكل ونوم
ومن الشحم ضاقت عباتج والهدوم
يااسمن انواع الحريم ياعايشه على الريجيم
ياانسه ياعانسه ياضايعه ومستانسه
ياتارسه وجهج صبغ ياتارسه عينج شدو
ياللي تقولين بدوي
انا بدوي ولي الفخر اني بدوي
عزمي قوي مااخون ماابوق الخوي
يبدي نهاري بالصلاة
واصارع امواج الحياة
ماضاقت الدنيا ابد
ولاني من اصحاب الحسد
ارفع ايديني للسما
واطلب من الله واستخير
مااقول يمكن ربما
والا يصير او مايصير
محافظ على الخمس الفروض واضح ولا احب الغموض
ولااتلون والتوي لاني بدوي
متمسك باصالتي ولااغير لهجتي
انا بدوي
في فزعتي وفي قومتي وبقعدتي وفي مشيتي وبجلستي و في كلمتي وبنخوتي
حتى عقالي ولبستي
لوقلتي عني فوضوي
ماضرني بالحيل يابنت بدوي
ويسرني
اعرف من انتي
ومن انا
والفرق واضح بينا
تدرين وادري من اكون ويكفينا نعرف بعضنا
انتي مثل عمر الزهور مالج عمر مالج سنين
شهرين ويجيج الجفاف وتذبلين وتصبح الوانج باهته
وانا جذوري ثابته ماخذ من الصحرا الهدو
وان جان هذا يسعدج
حطي على راسج يدج
لاقلتي بدو
ياتارسه وجههج صبغ
ياتارسه عينج شدو