دبحونا بالايملات يا جماعة ....شو القصة؟

مرحبا
كيف الحال انشاللله تمام

والله يا جماعة حبيت احكي هالموضوع الى مطلع روحي
بجد الواحد طق وطلعت روحو
والله الدنيا م بتسوى ...والرب واحد والعمر واحد
الواحد منا بيفتح ايملو عشان ينبسط لنو بيكون قرفان فبيقعد يتسلا او يستفيد شوية على الاميل مش عشان يلاقي حزن ونكد بكفي الى فينا من حرب ودمار
والواحد فينا بدو يضحك بدو يحب هالحياة الكئيبة بدو يتعلملو اشى من هالدنياة الى منيلة بستين نيلة بيكفي حزن ونكد ونصائح ملهش لزوم وهبل بنكتو وبنحكي
ياناس يا عالم يا هو بيكفي ايملات توصلني من هادا النوع كل يوم بيوصلني ستين ايمل المشكلة بتيجي تقراهم بلاقيهم بيحكو عن شو يا جماعة اما عن:
عصير البرتقان التبزينا بخلى الواحد معو سلاطان او
المرتديلا مصنوعة من امعاء القطط
والمادة ABCD XWZ 007 بتقطع النسل وتذبح البشر وبتعمل تسونامي
والبطاطا المقلية مخطط صهيوني لنشر المشروع الاسرائيلى
والتيلاندي بيعمل حصبة عند الاطفال والمسنين
وامريكا بدها تغزو العالم العربي بواسطة الجلاكس والسنكرز
ولسة في بيعملك حالو دكتور يخو ايش بيقول

شرب الماء البارد بعد المقلوبة = سرطان القولون، وإلا سرطان الجهاز الهضمي كله أحسن
شرب اللبن قبل الدجاج المشوي = قرحة في المعدة إلى الأبد وماتروح
أكل السلطة في صحن مسطح من غير ليمون = ديسك في الظهر والرقبة واليد اليسرى

ومع ليمون = التهاب المفاصل والركب والإصبع الصغير
عدم أكل وجبة الإفطار الساعة 6 = انسداد في الأوردة بالإسمنت
خبز الخباز = أمراض الكبد وإنفلونزا الجاج
واللي عاملين حالهم أصحاب نصيحة:
تكلوش بوزة تكلوش بيض وبصل تكلوش لبن وجبنة
سيبو الزبادي بحالو البطيخ مضر تاكلوهوش كلو الشمام بالشوكة وكلو البرتقال بشورية ملح
لالالالالالالالالا.....
ايش الصاير
طيب ايش نوكل احنا
اى هو يا ممنوع يا حرام يا بيساعد اسرائيل
وكل اشي جديد بيخيلونا على
كل اشي مسرطن يا في لحمة خنزير
بيكفي من هاد الكذب والهبل
الموبايل يسبب التفوئيد
والصابون سرطان مباشر ما في كلام
وشامبو جونسون للأطفال اللي كلنا من واحنا بالكفولة واحنا بنستعملو كيف يسبب السرطان ويقضي على الأجيال
واللابتوب يسبب الحصبة
كل مافتحنا الإيميل: إحذروا.... الامر خطير.... لا يجب السكوت عنه....
حصل في الشجاعية: سيدة خذت كارد فيه مادة مخدرة وصابتها دوخة وبعدين مش عارف شو صار فيها
هام جداً جداً جداً جداً جداً جداً جداً
احذرو بمصر وسينتقل للاردن عصابة تنقل مرض الايدز
ايش هالهبل الى بيعملو ع الناس بيطلعو اشاعات من عندهم ؟؟؟وقصص من عندهم؟؟؟
طيب يا اخي انت كاتب كاتب هات شى حلو مفيد
وكله كوم... وإيميلات الحلال والحرام ومابينها كوم ثاني
فتاوى الإيميل الحديثة، هذا حرام، وذاك حرااااام مضاعف، وجهنم الحمرا تنطركم كلكم، والموت وعزرائيل بيحسبو لكم الدقايق...
ياجماعة رب العالمين شديد العقاب صح
بس بعد غفور رحيم، وسعت رحمته كل شئ
والحي أبقى من الميت..
والرسول عليه الصلاة والسلام قدم الفرح على الحزن...
والله قال: "ولا تكن فظاً غليظاً"
هاد غير الوصاية والاستهبال :
الشيخ فلان مكشوف عنه الحجاب شاف منام اللهم صلي على النبي
وكلكم لازم تقرو الإيميل وتبعتو الى 10 أشخاص وإلا بينهار جبال المنطار... ايش الصاير؟؟؟
ولا الفتاوى والترهيب تبعت كل يوم:
"ارسلها"... عشان خاطر حبايب ارسلها بتندم... ارسلها أمانة عليك يوم القيامة.... استحلفك أن ترسلها..
انت مين تحملنى الامانة يا خى الله اكبر
مش ناقص الا يقلى "انشر احسن لك" أو "احترم نفسك وانشر""انشرها الاجى اخبط "
والا اللي ايقول لك: إذابدك لا ترسلها... بس الأجر بيروح عليك
يعني الأجر صار في هالإيميل...؟ فتحلى باب الحسنات يعني؟؟
والمتفلسف يقول لك: لاتجعل الشيطان يوسوسك ويقص عليك وما ترسلها
ولسة وعباقرة الرياضيات:ارسلها مرة تكسب 456739832469 حسنة
ارسلها مرتين تكسب 849656504594547664444748700000حسنة
بس ملينا.. حتى الدين ما رحمتوه؟؟
الإيميل وسيلة تبادل معلومات خفيفة واستفادة... مو منبر دعوة، ولا مركز خدمات أمراض الموت... ولا مركز التحذيرات من عصابات الطرنيب ,ولا أداة للتنفير من الدين ونشر فتاوى شيوخ سبيس تون
وإذا الإيميل له قيمة وفيه فايدة الكل بينشره بدون صيغة الأمر البايخة.. وطريقة أرجوك ابوس كندرتك ترسلها
خلوا الإيميل جزء حلو من اليوم، يرسم ابتسامة، ويضيف معلومة
تحياتي