o0o يوميات غزاوي في ايام الحرب o0o‏

يسلمووووووووووووووو

اهلااا وسهلاااااااااااااااااااااااا

المشاركة الأصلية كتبت بواسطة: اميـ بكلمتي ـرة;638090

شر البلية ما يضحك

أحلى شي تبع الفسفور

إقرأوها للآخر

سلام

==========================

بكل عفوية.. وبروح مرحة ... يروي الشاب الغزاوي كيف يقضي يومه خلال الحرب...

اترككم معه..!!

ويقول:

واجا اليوم العشرين..

وكل يوم بنقول هادة أقوى يوم.. وأعنف يوم ..

لا بس بجد.. اليوم أعنف وأقوى يوم شفناه..

كنا نشوف أغلب القصف على التلفزيون .. هلقيت صار قدامنا مباشر..

طول الليل الدنيا تضوي وتطفي.. زي الألعاب النارية..

بس العالم الألعاب النارية عندها من الأرض للسما.. إلا في غزة.. من السما للأرض..

هيهم وصلوا تل الهوى.. يعني بشيكل بكونوا عنا.. مش بشيكل ونص حتى..

أنا قاعد عالكمبيوتر.. وأهلي كلهم مجتمعين قالبين محللين عسكريين.. وعاملين غرفة عمليات مشتركة.. ومستغربين اني قاعد عالنت.. على أساس إنو الدنيا حرب لازم أضل قاعد ألطم..

تلت أسابيع قاعدين في الدار لا طلعة ولا نزلة.. ولا شغلة ولا مشغلة.. فش كهربا ولا ميا.. من كتر الزهق من القعدة الواحد بتحير ايش يعمل في الدار..

مرات بقعد أعد البلاط.. ومرات أكم كسرة في الستارة.. وأحياناً بقعد ألعب في الجوال (في حال كان فيه بطارية).. أو بقعد أتشغل في واحد من اخواتي..

ما علينا.. الحلو في الموضوع انه شلومو بتبين حنيته في وقت الحرب .. بقولك حفاظاً على رفاهية الشعب.. اعطونا تلت ساعات تهدئة في اليوم.. الواحد يعمل فيهم اللي بده اياه..

وأحلى ما فيهم انهم مشكلين.. يوم من الوحدة للأربعة.. ويوم من التمنية للحدعش.. ويوم من العشرة للوحدة..

وبقولك احزر الفترة تاعت بكرة واتصل على رقم تلت تمنيات اتنين صفر وواحد احمر.. بتكسب جائزة..

والله الواحد بتحير ايش يعمل في التلت ساعات .. مسافة ما يفكر وين يطلع (على أساس ضل مكان في غزة الواحد يروح عليه) بكونوا خلصوا..

اليوم قعدت أفكر أفكر ايش أعمل.. لقيت احسن اشي أعمله اني أنام.. عشان الجو بكون هدوء وفش صوت قصف (نسبياً) ..

لأنه طول الليل صوت القصف وصوت الزنانات بخليش الواحد يعرف ينام.. الواحد بحس انه في واحد بخرق في نافوخه بمقدح..

طول ما الواحد قاعد وهوة بسمع يا صوت صاروخ قريب.. يا بعيد.. يا بحس بهزة.. وبدينا نسمع مناطق غريبة صاروا يقصفوها..

مرة مقبرة.. ومرة صالة أفراح.. ومرة عمارة سكنية.. ومرة دار مهجورة.. أو بقصفوا مكان قصفوه قبل هيك (للتأكيد)..

طبعاً في هادي المناسبة بحب أتقدم بالشكر للطيار اللي بقصف بإنه بحدف صاروخ صغير عالدار قبل ما يجيبها نصين بالصاروخ اللي بعده..

شايفين الإنسانية لوين.. وبتقولوا عنهم عاطلين.. يعني اللي ما بصيده الصاروخ الأول.. معاه خمس دقايق ينفد بجلده قبل ما يجيب أجله الصاروخ التاني..

الأعمار بيد الله.. الواحد عنده يقين انه كل شي بأمر الله.. عالرغم بإنه الواحد بطل يخاف زي أول لما يسمع صوت صاروخ..

بس إلا إنه الخوف من انه الطيار أخو الشلن تحلو دارنا في عينه ويمزعنا صاروخ بحجة الغسيل اللي عالسطح بأثر عالزنانات..

دايما بحاول أواسي حالي بالمقولة اللي بتقول "متخفش من صوت الرصاص.. لأنه الرصاصة اللي حتقتلك مش حتسمع صوتها"..

بس هالمقولة بتنطبقش عالصواريخ.. ولا ايش رأيكم..؟

أكتر اشي بكيف عليه لما يرن تلفون الدار.. بنصير نتقاتل مين يرد عالتلفون أنا واخواتي.. عشان نحكي مع الناس اللي بتصلوا من الدول العربية..

كل واحد وحظه.. يطلع الإتصال من المغرب.. الجزائر.. مصر.. ليبيا.. السعودية.. السودان.. أو يتخوزق ويطلعله واحد بقولك جيش الدفاع الاسرائيلي..

ويطلع الشب بحزرك انه يكون عندك سلاح.. أو تتعامل مع واحد من المقاومة..

بس اليوم حسيت انه فش إلا تلفونا بكل غزة.. مسكتش وهوة يرن..

-
ألو السلام عليكم...

-
وعليكم السلام..

-
معك فلانة من ليبيا.. الله معكم.. الله ينصركم.. الله يقويكم..

-
تسلمي يا حجة.. إدعولنا..

-
الله ينصركم ويحفظكم..

-
يلا سلام عليكم..

-
وعليكم السلام..

هادي عينة من المكالمات اللي بتوصلنا.. مع انها صغيرة وفهاش رغي وطق حنك .. إلا إنها بتحسس الواحد انه مش لحاله وفي حد معاه..

ويا حبيبي لو خلال المكالمة نزل صاروخ ولا الخمسمية تاعت الأباتشي اشتغلت.. شوف العياط على التلفون .. وبدل ما هما يصيروا يواسوك ويهدوا فيك.. احنا بنصير نهدي فيهم ونسكتهم..

لأ والشغلة الجديدة اللي غايظاني قصة الفسفور.. أنا طول عمري بسمع انه الفسفور في السمك.. وإنه مفيد للشسمو.. وكل ما الواحد كان ياكل سمك.. كان يحس حاله صار يضوي من الفسفور..

بس هان الوضع مختلف.. فسفور صح بخليك تضوي.. يعني أول ما تيجي عليك قذيفة فسفور.. وتهب فيك النار.. حيصير اللي يشوفك يقولك منور ياحج.. الله يلطف فينا..

طبعاً وقت الفراغ الواحد بحاول يستغله بإشي مفيد.. أنا استغليت وقتي برياضة جديدة.. وهية رياضة براميل الميا..

أول ما أفتح عنيا على طول بمارس الرياضة اليومية.. بطلع على سطح الدار بتفقد البراميل.. وقديش ضايل ميا.. طبعاً عن طريق الدقدقة على البرميل..

الواحد صارت أذنه موسيقية برميلية.. وصار من صوت الدقة على البرميل يعرف إذا كان فاضي ولا مليان (طبعاً هادي الكل بعرفها).. بس الجديد واللي اكتسبته مع الخبرة انه لو كان البرميل مليان أعرف أكم لتر ميا فيه..

أنا لقيت حالي لهلقيت عايش قلت أكتبلكم أحكيلكم عن وضعنا.. بكرة يمكن أكون عايش بس مش قادر أكتب.. أو مش عايش من أصلو..

إدعولنا.. إدعوا تنحل هالقصة على خير.. إدعوا للمقاومين.. إدعوا للشهدا.. إدعوا للجرحى.. إدعوا للناس الله يصبرها.. إدعوا للكل..

ولو ضل معكم وقت.. إدعولي أصير غني..

ونشوفكم على خير..

ان شاء الله مرتبتك بالجنة
وتصير غني بحياتك بهالدنيا
وبلقائك عند رب العالمين

اقتبـاس ،،
يا سلام عليه هالأخ

فعلاً اللي من أمثاله وبقولها بكل احساس بتحرك بجسمي

هاي هيي المقاومة هاي هيي الرجولة

قرأت الأحداث الي حدثت مع شخص من الآلآف من سكان غزة

كأنه حكى عن مليون غزاوي وبالفعل حسيت انه أنا متواجد بالغرفة وبكسر معك وبلعب بالجوال معك ههههههههه
وبسمع صوت الصواريخ هههههه .

يعني مش عارف اشكر اول اشي اللي حضرت الموضوع ولا اشكر كاتب الحدث الحقيقي !!!!

والمشكلة الكبرى من شدة أعجابي بالموضوع متمني انه اعمل لكل جملة كتبها اقتباس واعلق عليها بس المشكلة وقت ما في وبدها طولة بال

بس بحب اذكر انه فعلاً 3 أحداث حصلت مع هذا الشاب أثرت فيي مزبوط اللي هما :

1- حادثة الفسفور 2- المكالمة الهاتفية الطائشة من فتاة من ليبيا 3- الأستهزاء بالطيار عند قصف أي موقع (شدة اعجابي باستهزاء الأخ عن هذه الحادثة)


المقالة بالكامل من أول سطرها لأخره مؤثرة ومضحكة واجمل ما في الأنسان انه يبكي بأبتسامه .

وقلوبنا ودمنا وأيدينا مع غزة وان شاء الله سلاحنا يكون لغزة بفضل الله

وبنغمض عين وبنفتح عين واللي مذكور بالقرآن رح يصير


شكراً يا اخت

اهلا وسهلا فيك CRIMINAL فكرت الموضوع مهمل ما حد بشوفه او بعلق عليه

كلامك صحيح والله بحسس الواااحد انه عايش معهم

وبنهنيهم ع روووحهم الجباارة القووية يلي ما بتنووجد في نفس اي شخص

يمكن ربنا فضلهم علينا اعطاهم الشهادة يلي كل انسان بتمنى يموت شهيد

نتمنى كمان للجرحى بالشفاء العااجل وللاسرى بفك اسرهم ولغزة بفك الحصار عنهم وربنا يتقبل كل شهيد بشهادته

اقتبـاس ،، ان شاء الله مرتبتك بالجنة
وتصير غني بحياتك بهالدنيا
وبلقائك عند رب العالمين

ان شاء الله يااارب نلتقي كلنا سوا بالجنة

شكرا يا زوء وبتمنالك التوفيق عالمشاركه وبتمنى المزيد

والله حسيت كأني عايشة معهم واني كنت معهم بوقت القصف ...
يسلموووو حبيبتي على الموضوع المميز ...

ان شاء الله مرتبتك بالجنة
وتصير غني بحياتك بهالدنيا
وبلقائك عند رب العالمين

اهلا فيكم جميعااااااااااااااااااااااااا