هاوطى صوت التلفزيون
احتراما للجثث..
وهالاقى طريقة اقنع بيها نفسى
ان اللى على الشاشة ....
مجرد فيلم
دخل بالغلط فى نشرة الاخبار
بعد ما ينتهى التصوير
الامهات هيمسحوا دموعهم
وهيصحوا العيال عشان معاد الرضعة
وهم بيفكوا الكفن المزيف عنهم بشويش
الشباب اللى مرمين على الارض
( قال يعنى مقتولين )
هيقوموا وهم بيضحكوا ..
وهيشتموا المخرج فى سرهم
لانه بهدل هدمومهم ميكرو كروم وطلاء احمر
اكتر من اللازم ...
عربية الاسعاف هتطلع مجرد ديكور ...
مفيهاش موتور اصلا
العمال اللى فى الاستوديو
هينتظروا بنفاد صبر ....خروج الجميع
وفى ظرف 5 دقايق
هيفضوا المكان
عشان تصوير المشهد الجديد
اللى مش محتاج ....غير
مؤلف واقعى
نعم ...هكذا هو فى عينى مشاهد تتكرر باستمرار
