يقولون ما لا يفعلون
ما بقى إلا سود الأيام تحرمك الرقاد
كيف الأوهام تجرأ تسريك مغبون
من متى تجزع من الدمع وتخاف البعاد
من متى تقفي بك ظنون و تجيبك ظنون
صرت تاخذ كذبتي صدق ومزاحي وكاد
لوبقول إني بخونك تحسب إني بخون
ما تعرف إن كل شاعر يهيم بكل واد
وإنهم دايم يقولون مالا يفعلون
أبكان لو قلت أبنساك وأنكرت الوداد
والله إني ما نسيتك ولاهم يحزنون
من يجزع من صفعة الشمس يطمع بالبراد
ومن فقد وجهاته الخمس يلقى بك ركون
اعتبرها هفوت إنسان أو كبوة جواد
لو بتسمح فنت غالي ولو تجرح تمون
عد صداتك مروة وطعناتك ضماد
خلهن لا راحن طعون ولا ردن طعون
خنجرك يستاهل الطعن ومتوني شداد
ومنك يا زين الخناجرويا بخت المتون
رد لي حنية المزح بإحساس الجماد
خلنا واحد يجي صلب والثاني حنون
موت فيني واندفن فيك بثياب الحداد
وان حييت أموت لرضاك واحيا بك بهون
مره ارقد بالكفن وانت ترقد بالمهاد
ومرة ارقد بالمهد وانت ترقد بالكفون
أدري إن شجونك شجون وعنادك عناد
والبلا إن عنادك عناد وشجونك شجون
ربك اللي سخرك لي تقود وما تقاد
والله الخالق ولله في خلقه شؤون
ازرع ضلوعي من رضاك وابشر بالحصاد
لعنبو من جيت ترضيه وترد محزون
بس تسوالك بلد قول تسوالك بلاد
انت كل العالم بكون و لحالك بكون
ما بعد محبتك حب ومرادك مراد
غير كونك سيد حشاي تدري من تكون
نعمتين اختصوا الخلق من جود الجواد
كافل الأرزاق من حيث ما لا تعلمون
البنون ونعمة المال في عيون العباد
زينة الدنيا بلا شك في كل العيون
مثل زينة دنيتي بس عندي شي زاد
من عرفتك صاروا المال وانت والبنون
أنتشي بك نشوة التيه لعناق الرشاد
وأفزع إلك بفزعة القرم لشهاق الزناد
وأحصنك تحصين الرزاق عن درب الفساد
وأعشقك عشق المظاليم لفراق السجون
لو تزيد الشوق جمرة تحولني رماد
لو يزيد العشق شعرة بوصل للجنون
خلي هقواتك كبيرة ونظراتك بعاد
كانك انت بكبرك تهون من اللي ما يهون
أزعلك وأرهن حياتي تحت رحمة زناد
تهبه لا والله إلا انت والموت تهبون
عاد إذا ما أرضاك هرجي وأنا اللي قلت فاد
إننا لله وإنا إليه راجعون
ونت باكر بتعرّف على ناس جداد
والكلام يجيك من كل شكل وكل لون
لا تحسب إن كل كلمة بتسمعها وكاد
ولا تصدق هرج شاعر وتخدعك الظنون
دايم اعرف كل شاعر يهيم بكل واد
وإنهم دايم يقولون ما لا يفعلون
حتى أنا اللي قلت أعشقك وما طيق البعاد
يمكن اطلع ما عشقتك و لاهم يحزنون
.gif)