شب نار الهم فيني دام حبك لي جحيم
واحرق القلب المولع لين يتحول رماد
شبها في ضلوع صدري بين طيات الصميم
لعنبو ذيك المحبه ولعنبو ذاك الوداد
مابقى للغيم دمع ومابقى للدمع غيم
السهر عاف الليالي وانتهى عهد السهاد
والجروح اللي على خبرك بها نزفا قديم
تندمل ساعه وداعك والصبر عنك ضماد
زرع حبك في ضميري للاسف اصبح هشيم
لو سقيته مارويته لا ولا يرجى حصاد
ياعذابي من عرفتك صارلعيوني لزيم
وماعرفت الحزن الا من عرفتك بالوكاد
ومال حظي من لقيتك واصبح لقلبي خصيم
وماتت بقلبي الاماني ولا لقيت الحظ جاد
وش جنيت بحبك اللي مارحم طفلا يتيم
خان به حظه وجيته تلبسه ثوب الجداد
خاف ربك في عذابي دام ربك بك رحيم
وارحم اللي بك تولع في هوى شفك وراد
غلطتي بس كنت واضح في غرامي بك غشيم
ماعرفت العب واجامل جيتك بقلبي سناد
غلطتي جيتك بقلبا مايبي غيرك غريم
كن ما فالناس غيرك ومابعد قلبك بلاد