حبٍ يشيّب وصاحبه ما بَعَدْ شاب
وحبٍ يشيب وصاحبه فـي شبابه
وحبٍ يغــيب وصاحبه ما بَعَـدْ غاب
وحبٍ يــدوم وصاحبه فـي غـيابه
وحب يــذوّب خـافـقٍ مـا بــعـد ذاب
وحبٍ يداوي صـاحبه مـن عـذابه
وحبٍ يتـوّب خـافــقٍ مـا بَعَــدْ تـاب
وحبٍ يــزيدك رغبـةٍ فــي الكتابه
وحبٍ حـــيــاته كلّــهـا لــوم وِعْتاب
وحبٍ حقـيـقي مـا يضـرّك عتابه
وحبٍ بـلا معنى وحــبٍ بـلا اسـباب
يبدا غــريب وينـتهي في غـرابه
وحبٍ ضعـيفٍ مـثل حبرٍ عـلى كْتاب
تمحـيه دمـعــه في ثــواني كـآبه
وحبٍ قـويٍ مـثل قصـرٍ لـه ابــواب
لو هبّ عاتيْ الريح مـا اهتز بابه
وحبٍ بـداية رحـلـته نظـرة اعـجاب
وآخــر مـطــافه مثــل يومٍ بدا به
وحبٍ يعـيش بداخل قْـلوب الاحـباب
وحبٍ يشيـع وكـــل حَــيٍ درى به
وحبٍ مقامه في ضلوع الصَدِر طاب
وحبٍ يــعــدّي مثــل مـرّ السحابه
وحبٍ عـلى قبره نعــق بـوم وغْراب
وحبٍ تغــنّى به لــحــون الربابــه
وحبٍ بــمقــدارٍ وحبٍ بـلا حْـســاب
وحبٍ بمـعــروفٍ وحــبٍ نهــابــه
وحبٍ يعيش أهله وسط داره اغراب
ويموت قهــر ويندفن في ترابــه
وحبٍ غدا سـرّه سـوالـف للاجنـاب
وحبٍ يموت وصاحبه ما حكى به
