ثلاث أيّام
ثلاث ايّام مرّن فـي حياتـي غيـر ثلاث ايّام عشت الحـبّ واغليتـك
ثلاث ايّام واتهجّـى كـلام الطيـر كلام أعْذَبْ من اعْذبْ مـن تفدّيتـك
رسالة حبّ شاهدْها غـلا وْتعميـر على فْوادي تربَّعْ واسْكـنْ فْـبيتـك
أقول إشْ قد انا عطشان وانت البير دَلو فكري نَضَحْ من كلمتـي ليتـك
أقول ال(ما يصير) لْعينك انت يْصير ولو حتى بْثرّيـا الكـون حطّيتـك
حبيبي والغلا صوره بـلا تصويـر صوَرْها بكل رَمشة عين أنا ريتـك
حبيبـي والعطـا يحتـاج للتقديـر إذا صرّحت أنا اللي حّيـك وْمَيْتـك
ثلاث ايّام مرّن فـي حياتـي غيـر ثلاث اّيام عشْت الحـب واغليتـك
ثلاث ايّام لكن ما ادري شِ التفسير بس.. ادري من ثلاث ايّام حبّيتـك
للشاعر الشيخ حمدان بن محمد بن راشد آل مكتوم
.gif)
