شكر خاص للفنان عمر العبدلات على الكاريكاتير
مقال نشر في مدونة أسامة الرمح, أعدت نشرها بعد أخذ أذن الكاتب
اذا حبيت تتمشى في احد شوارع الأردن، اوعى تفكر انك تسلم على حدا ما بتعرفوا، لإنو هاي اهانة، ويمكن يمسكك ويعجنك، ويحطك جمب تمثال الجندي المجهول، ويصير اسمك “الزائر المجهول”.مقال نشر في مدونة أسامة الرمح, أعدت نشرها بعد أخذ أذن الكاتب
اذا وانتا ماشي في الشارع شفت باص وعم تطير منه كنادر وأواعي، لا تستغرب، هاد باص مدرسة بنات ومن المحتمل إنو في عمليات شد شعر وشلح كنادر ومسبات عيب، يعني حرب عالمية صايرة جوا.
اذا وانتا ماشي في الشارع شفت طوشة بين شباب، أول شي سبب الطوشة يا بنت، يا واحد كان بتولدن عالتاني بالسيارة، المهم اذا حبيت مجرد حب إنك تتدخل وتفزّع بينهم اعرف انك تسجلت ضمن قائمة الشهداء اللي ماتوا موتة بشعة.
اذا كنت بتستنى على دوار وفش غيرك بالشارع ومع هيك في ازمة اعرف انو في شرطي على الدوار بنظم السير أو وحدة سايقة السيارة وواقفة بنص الدوار بتزبط مكياجها، بتكون بشعة بتشبه البقرة بس مصدقة حالها.
اذا رحت على دائرة حكومية مشان تخلص معاملة، رح تشوف ناس واقفين طابور على شباك، في زلمة قاعد عالشباك عندو شنب فش عندو اشي تاني بوجهو، يعني كل وجهو شنب وغالباً بكون اسمه عُقلَة ولازم يكون عم بشرب شاي وبدخن سيجارة مع انو التدخين ممنوع، هالزلمة باله طويل ومش فارق معه كل الواقفين، سيبك من الشغلة هاي كلها، وانزل الدرج بدّك تروّح، في كتير زبالة مرمية عالدرج وغالباً رح تتزحلق بقشرة موز وتوقع عالدرج وتتكسر ضلوعك، وانتا واقع عالأرض رح تفتح عينك تلاقي بوجهك ولد صغير مفقوع بوجهه جرة غاز بحكيلك: عمو معك شلن ؟؟؟ رح تصيبك جلطة من منظره فوراً وتموت.
.
اذا شفت بنت ماشية في الشارع، وشو هالكسم وشو هالمشية وشو هالـ إحم إحم، واجيت بدك تزبطها ولما قربت منها فجأة لقيت زعران ونَوَر وسلاحف النينجا جايين عليك، هدول يا سيدي ولاد حارتها، رح يدغدغوك من الضرب، وبالأخير هديك البنت بتطلع مش بنت، بطلع شب فايع “كتشير” ورايح عالمول، طبعا اللي كانوا بضربوك رح يتركوك ويلحقوه، يمكن إلهم مصلحة فيه.
أحلى شي العُطَل في الأردن، على أي نكشة بصير فيه عطلة، اذا نزل مطر شوي هاد دليل على عواصف ثلجية قادمة، وعطلي يا مدارس ويا جامعات.
إذا كنت واقف بحالك لا إلك ولا عليك زي الهبيلة في الشارع واجى عليك واحد وحكالك: معك وَلعة أبو الشباب ؟؟ هاد يا سيدي جاي يكب بلاه عليك من غير سبب هيك، اجى ع باله يخبص وجه حدا، وانتا هاد الحدا.
إذا حبيت تاخد حبيبتك بالسيارة وتروحوا مكان لا يراه انسان، ورحت ولقيت سيارة ماكلة هوا واقفة بهديك المناطق، هاد بكون يا واحد جايب حبيبته يلعبوا شدة متلكم يا بكون.. فش غير هيك.
أول ما تيجي عالأردن وانتا بشارع المطار رح تلاقي اعلانات كتير بالشارع، همه 3 شركات موبايل فش غيرهم، أول وحدة بتحكيلك: “مشان الله اشتري خط من عنا”، تاني وحدة بتحكيلك: “وعرظ اختك لتشتري خط من عنا”، أمّا التالتة بتحكيلك: “الله يلعن…. إذا ما بتشترك معنا”، حُذف لأسباب تتعلق بالأدب والأخلاق.
إذا حبيت تركب تكسي، مو مشكلة اركب ما بحكيلك تركبش، بس بالنسبة للراديو يا رح تسمع محمد الوكيل يا اغنية “قوات الأمن العام بتحافظ عالنظام”.
إذا مشيت في شارح ولقيت ع يمينك نادي ليلي و ع شمالك نادي ليلي وبين كل نادي ليلي ونادي ليلي في نادي ليلي فإنتا في شارع الجاردنز.
إذا مشيت في شارع كله بنات “مبرقعات” وحسيت حالك في الخليج وكل بنت بتركب مع شب بالسيارة، فإنتا أكيد قريب من سكن طالبات الجامعة الأردنية، من الآخر، انتا عند البوابة الشمالية.
إذا كنت بشارع بعيد شوي ولقيت سيارات واقفة ع جنب عند عرباية قهوة، نص السيارات هاي (السيارات الثابتة) بتكون فيها شباب بمارسوا عادة “الشرب” والنص التاني (السيارات اللي بتهز يمين وشمال) بكون فيها ناس بمارسوا عادات أخرى.. فإنتا بتكون في عبدون قريب من السفارة السورية.. ونيالك يا بيّاع القهوة.
