من زماان ما كتبت موضوع

مسا الخير :mornincoffee:


مرحبا القصة وما فيها انه انا من زمان ما كتبت موضوع

وحالياً كتير زهقااان وانتوا اكيد زهقانين

ملاحظة : في بعض ناس حالياً هم في البوست لو سمحتو اطلعو وبس تتجاوزو السن القانوني

سبحان الله عارف حاله قاعد بيفكر يرد علي :hah:

على العموم مش قصتنا

بس سكر الباب وراك :popcorn:

هدا يا سيدي العزيز انا انسان قرفت الحياة من جميع النواحي

فهديك اليوم قررت انا وهالصديق انه نعمل عملة شنيعه نطير فيها على وجه هالدنيا

ووالله فعلا رتبنا امورنا (( بي اس )) ما حدا يسألني شو هالشغلة

واتصلنا على ناس وصرنا مواعيد واتفق على شغلات ومن هالحكي تاعون القصص هديك

انا كنت خايف طبعاً لانه اول مرة بحياتي بدي اعمل هيك بس صاحبي اللي معي كان عادي

وكأنو شي روتيني بيعملو كل يوم المهم بعد عدة سهرات وتخطيطات بيني وبين صاحبي

شو رح نعمل في حال صار هيك وشو رح نعمل في حال ما صارش هيك

وخلص خلصنا كل شي

وايدينا صارو يحكوا على اساس انه القبضه اقتربت

ونروح على المكان الموعود

وبلشنا يابا نجري اتصالات وهينا احنا محل ما حكيتولنا

جيبو الاغراض وتعالو (( في ناس فاهمين شو يعني اغراض ))

المهم وولله من كل قلب جامد

صاحبي يروح ينط على البضاعه ويبلش ينقل يابا وانا اشد الهمه وانقل

ضلينا ننقل كمية كبييييييير

يعني بتساوي ثروه بس احنا بنتعامل مع ناس كبار يعني بنقدرش نروح يمين شمال

وانقل يابا لحد ما تصير ماما

بعد ما خلصنا وصرنا نشوف البابا ماما

اجى واحد بيحكيلنا مشالله عليكم انتوا شغيلة وانا بقدر اساعدكم اكتر من هيك

احنا صفنا في بعض وحكينا هسه حنصير نشتغل على ثقيل رحنا فيها

وحكالنا اتفضلو معي

راح ودانا على بني ادم حاطلي "شجرة سوجار" بتموو وعشرين بني ادم قاعدين بيولو بنار ع شان يولعولو سوجارتو مما ادى الى احرق 5 حتى الموت وتشوه الباقين والمشكلة انه مش راضية تولع

المهم رحت انا طلت الكبريته من جيبتي وولعتلو ياها

وصار يحكي معانا من روس مناخيرو وانا شغلي هيك هيك وما حدا بيلعب معي بالسوق كلو

حكينالو طيب يا مان ازا الناس هدولاك لقطونا شو نعمل حكى لاتعترفو واحكوا انكم ما بتعرفو شو في بالشنتات

وهو حكاها بكل رومنسية وهدوء يعني وكانو بيحكيلنا انه رح تصير

ولا هو هيك اتطلع علينا بأبتسامه خبيثة وحكى وازا بدكم اعترفو

بس ازا بتزكرو اسمي قدامهم واشار الى عنقة وبحركة فنية يمثل ان بيده سكين تخترق رقبته

وانا وصاحبي نبلع ريقنا يابا

بس بتعرفو شو المشكلة انه احنا اصلا بنعرفش اسمو فـحكينالو اتطمن احنا رجالك يا ابصر شو اسمك

المهم حكالنا عن وظيفتنا الجديده اللي رح تصير

وهدا يا طويل العمر بدو يلبسنا بدلات ورح تصير عملية تبادل بين ناس تانيين بفلوس رح يكون النا حصة فيها 2% واحنا كيفنا 2% من هيك مربح بنعيش فيه باقية عمرنا

وبلشنا نحضر حالنا على شان القصه واخدو مقاساتنا زي العنجد

وخيطولنا البدلات وعملونا هيك مكياج وابصر شو حسيت حالي داخل على مسرح تمثيل

المهم ع شان كانو بدهم يخبو بعض ملامح وجهنا ع شان ما ننعرف مع مرور الايام

المهم اعطاني شنته حلوه متكتكه والله والعليم شو فيها يا مان

وخفيفه الشنتة يعني بيجوز وزنها 3 كيلو يعني خفيفه بالنسبة لشنته

وصاحبي اخد نفس الشنته اختها بالرضاعه

وبلشنا نتحفتل هون وهون على اساس انه احنا رجال اعمال ولا ابصر شو

بس انه نتصرف متل الرجال الكبار والراكزين

بعد شوي يابا صفت سيارة عنا

وصاحبي هداك الحمار فكرها بحث جنائي ع شان لون السيارة ابيض وصار بدو يشلف

وانا يا جبل ما يهزك ريح المهم اجى واحد ومعو شنته متل شنتتنا بالزبط اختهم التالتة

فأنو اخد الشنتتين واعطانا شنته وحده بس الشنتة اللي اعطانا ياها ثقيلة كتيير

فصاحبي خف عقلو وصرنا نفكر بطريقه غبيه انه ناخد الشنتة ونشلف :cry2:

بس يابا على مين ما شفنا ولا تنين اجو واخدونا وودونا على البوس اللي ما بنعرف اسمو

واعطانا كل واحد حصتو وانا وصاحبي ووووووووووو مبسووطين شغل لمدة يومين براتب عن مدة 20 سنة :yaaai:

وبعدين واحنا مروحين شفنا شغلات بتضوي فوق روسنا

وي وي وي وي وي وي

واحنا اركض هب ولا هي سيارة اسعاف جاي من ورانا :nosweat:

ركزنا ومرقت سيارة الاسعاف وراحت وراحت الـ وي وي وي وي


ومشينا وسمعنا الصوت كمان مرة وي وي وي وي فكرناها نفس السيارة وضلينا ماشيين

الصوت فرق راسنا صار بنطلع ورانا ما في سيارات نهائيا

ايه طيب من وين صوت سيارة الاسعاف هي ؟؟

اتطلع يمين يسار شو هالصووت ينعن عرص

وصاحبي صار بدو يعيط يعني ما في ولا سيارة من وين جاي هالصوت انا مش عارف

فـ انا صرت افكر تفكيرات غريبه انه الشررطة عم بتعذب فينا بهالطريقه او بدهم يشوفو ازا بنشلف ولا لأ

بس الصوت جنبي بالزبط بس ما في ولا سيارة اسعاف ولا سيارة شرطة

فبالاخير انا وقعت على الارض وصاحبي خف عقلو صار يخبط فيي عصووووم بعرض اختك قووم

مالك يا زلمة وانا صرت اتشهد وحسيت حالي انه هدا اخر يوم بحياتي

وهو يحاول يوقفني

اجيت انا فتحت عيوني لاقيت حالي بالبيت وبفرشتي وفي سيارة اسعاف موقفه ع باب البيت وقاعده بتزمر :nosweat:


بس يا جماعه حلم غريب شوي بس اغرب شي فيه انه مش عارف مين صاحبي اللي كان معي :cry2:

اي واحد بيتعرف عليه بأي سجن من سجون الاردن يحكيلي حرام ياكله للحكم عني وعنو

ع الاقل يتوزع الحكم


بديش ردود واي واحد جاي ع باله يرد يتفضل يرد :ang:

واللي بدو يحاول يكتب رد بايخ ياريت ما يكتبو :face (11):

لانه انا عصووم والكل يهز :7noon:

يعني يمكن شوي اخليه يتمنى انه ما دخل البوست :encore:

تحياتي لعيون الامامير :7noon:

والله يبعد عنكم شر الكوابيس

مع انه الحلم كان حلو

بس لحد الان مش عارف وين خبيت الفلوس :cry2:

زهقتو صح ؟؟!! :aass: