[poem=font=",6,,normal,normal" bkcolor="skyblue" bkimage="http://www.jo1r.com/jo/mwaextraedit2/backgrounds/1.gif" border="double,4," type=0 line=0 align=center use=ex num="0,black"]
عذب السجايا وعـوده بـأول الكنـه = متى تزين السوالف وآخـذ علومـه
واسامحه عن خطاه الجـرح والونّـه = واعاتبه لو يصـد شـوي والومـه
واذكره بـاول المسفـار حتـى إنـه = لا من تذكر زمان اول نسـى نومـه
يوم إنه اقبل خدين الروح يـوم انـه = واقبلت اراعيه والقومة هي القومـة
من يومها والحشا ما عاد لـه خنـه = إلا لصوتـه وميـعـاده وملـزومـه
عفري هنف للضلوع وجا لهن حنـه = واستانست له فياض القلب ورجومه
لبى جبينـه لا ارتـج الغطـا كنـه = برقٍ يصب الرفيـف بكبـد ديمومـه
ما اقول شفته وشفت البيض يتلنـه = اقول شفته وشفت الشمس منجومـه
ما اقول كن الجديـل الليـل لا كنـه = ليل خرعه الظـلام وضيـع نجومـه
يا قبلـة الله هكـا العنقـود لا منـه = قام يتهجا شـذا عطـره ويشمومـه
فيه انتهى النور .. لا والله بدا منـه = فجر نعس بالوريـد ونـام بهدومـه
وردٍ تفرعن حَمَاره قلـت ابـا اكنـه = الى متـى والحنايـا منـه مفطومـه
فز وتطرق رطيبه... قلت مـا عنـه = بالـم شيحـه وريحانـه وقيصومـه
صد وتلعثم هديلـه فـي بـرد سنـه = يا قوم ذا النور يوم انكت ... يا قومه
الله عطانيـه والله يعطـي الجـنـه = واليا استجد الهوى كـلٍ ومقسومـه [/poem]
