يامطول الغيبات
يامطول الغيبات وش ذنب الاجفـان
تشكي لجمر الهجر بعـد الموانـي
تغيـرت بعـدك مقاييـس الازمـان
حتى الثواني دهـر ماهـي ثوانـي
في غيبتك كني للاحـزان سلطـان
وكن السعاده شعبي اللـي عصانـي
أحزان اودعهـا وتلفينـي احـزان
لاراح وفد زارنـي وفـد ثانـي
ويحيط بي من كل هاجوس يقظـان
يمنع عن عيوني الكرى لو غزانـي
وشلون اقول النوم سلطان اذا كـان
النـوم متوطيـه هـم وطانـي
ياصاحبي ماجاش في صدري اشجان
ولا خفـق قلبـي وهـز المحانـي
الا لخوفـي لاتكـون انـت نسيـان
عهد مضى واحلامنا والأمانـي
تدري بدونك شارد الفكـر حيـران
مااغروا عيوني المترفات الغوانـي
ياما تمنيتـك تجـي طيـف ندمـان
وتمد لي كـف اعتـذار نسانـي
ترى النـدم توبـه ويعقبـه غفـران
إن خفت ربك فيّ تعـرف مكانـي
