أكذب عليك إن قلت ماني بمشتاق
وأكذب عليك إن قلت حبك نسيته
خل الكلام اللي طعن صمت الأوراق
يحكي لك اللي ما نطقت وحكيته
ناظر عيوني شوف تاثير الأشواق
شوف الفرح وشلون بعدك جفيته
كتفي يشيل من الزمن فوق ما طاق
والضيق يرضابي وأنا مارضيته
الى متى وأنا انتظر لحظه إشراق
الى متى والحزن هالقلب بيته
الى متى والهم ينحت بالأعماق
وأسقيه من فراقك دمع بكيته
ياصاحبي شف خاطري ما بعد راق
بنفس الطريق اللي انتهى وابتديته
ضاق الزمان وكل شي بعدك ضاق
حتى القصيد اللي بصدري احتويته
عمر الشعر ما ضيق صدور الأوراق
الضيق ضيقي لاكتبت وقريته
تعبت أجمع ما بقالي من أشوااق
وأقول ليت الوقت يفهم ياليته
ياقو قلبك وأنت محرقني إحراق
إرفق بحال اللي ذكرك ونسيته
تدري عزاي ان حدك القلب تشتاق
دور علي بكل درب مشيته
يمكن تلاقي درب بدروب الفراق
يجوز ربي كاتبه واهتديته
ومدام ربي في يده قسم الارزاق
أنا اقتنعت بما كتبه ورضيته
