شعر سمو الشيخ حمدان
.
مرّت سنه والعين يعشقها السهر
ومرّت سنه والشوق باقي ما انمحى
ومرّت سـنه والقـلب ذابحه الهـجر
ومرّت سـنه والهجر عيّا ما استحى
ومرّت سنه ومرّت سنه وانا انتظر
ومرّت سنه والوصل نايم ما صحى
ومرّت سـنه ما جا من الـغالي خبر
ودارت على حَـب الـمحبّـين الرحى
ومرّت سنه صابر وعذري في الصبر
شـماتة اصـحاب الشـوارب واللحى
وعيـونه السـود وشـفايفه الـحـمر
وجديل يضفي فوق متنه لا انتحى
وصدرٍ يسد الليل عن نور القمر
وخدٍ يسد الصبح عن شمس الضحى
ومرّت سنه واخاف لا يروح العمر
وانا انتظر والشوق باقي ما انمحى
