نتائج البحث عن ردود العضو : أسامة الرمح

 مشكور على البرنامج جاري التجربه ..

 مقالة رائعه فعلا ,, على قولة احد الشركات التي كنت اعمل لديها .. نحنا فاكتوري لــ دول الخليج شركاتنا 



وعند عقول نباهي بها على مستوى العالم لكن للاسف كبلوها بقييود . 





ومن اهم اسبابـ رواتب متدنية جدا 

 ما إني بكتب يومياتي كل شهر مرة، فكرت  اخليها شهرياتي بدل يومياتي، أو إني أشد حيلي شوي وأحاول أكتب كل اسبوع..  يا سيدي كل اسبوعين المهم أكتب يوميات بني آدم بشكل منتظم زي البني آدمين.  

 
ندخل في المهم، هداك اليوم طلعت الصبح من  البيت وكالعادة عالدوام، إيدي على قلبي لإنو في شوية touchat في الشغل بين  كم حدا وكم حدا، فخفت لأوصل الشغل ألاقي مجزرة أو حدا ضارب حدا موس أو بشفرة حلاقة، أو ألاقيهم كلهم ميتين، بعيد الشر.
  

 
ندخل في المهم، وصلت عالشركة وكان الوضع  هادي، لا قتل ولا إجرام ولا إرهاب ولا ميليشيات عسكرية ولا اي شي من اللي  كنت أحلم فيه، بس برضو كان يوم طويل وزنخ والدنيا حر وما حدا طايق حدا ولا  انا طايق حدا ولا حتى طايق حالي.
  

 
ندخل في المهم، من كتر الحر والزهق والتعب،  دخلت على حمام الشركة بدي أغسل وجهي، مشان أنعنش.. رحت لقيت بشكير، ولقيت  “دوش” أول مرة أنتبهله، من غير تفكير، وعلى طول أخدت دوش.. ما هوه يا باخد  دوش يا بموت من الحر، خلصت ولفيت راسي بالبشكير زي سندباد وطلعت من الحمام  شو انسان جديد، قصدي بني آدم جديد.. ورحت عملت كاسة شاي أخضر وقعدت في غرفة  لحالي أشرب الشاي وحطيت اغنية “بعدك على بالي” تبعت فيروز.. يعني بالزبط  زي ما بصير في الحمام السوري.. فرفش.
  

 
ندخل في المهم، أخيراً خلص الدوام، وروّحت  عالبيت ميت جوع، نسيت أتغدى وأول ما دخلت عالبيت لقيت أكلي جاهز بس مافي حد  في البيت، صحن رز وملوخية و”جاج”.. يمي يمي وجبة غذائية منزلية صحية 100%  .. قعدت بدي آكل، بس طبعا هالوجبة من غير ليمون ما بتنفع، قمت ادوّر على  ليمون أدوّر على ليمون.. في البيت مافي ليمون.. بس عادي، في دكّانة تحت.
  

 
ندخل في المهم، نزلت عالدكّانة اشتري حبة  ليمون وحدة، أول مرة بحياتي انزل اشتري حبة ليمون وحدة أو حبة وحدة من أي  نوع خضار.. حسيت حالي عزابي في بلاد الغربة، أخدت الليمونة ورحت أحاسب، كم  يا معلّم؟ قال: 30 قرش.. دفعتله 30 قرش.. وكمّلت عالبيت مشان آكل.
  

 
قعدت عالطاولة مع الليمونة، وجبت سكينة بدي أقطعها، لسه بدي أقطعها راحت خطرت ببالي شغلة..
  

 
ليييييييييييييش الليمونة الوحدة حقها 30 قرش ؟!؟؟؟؟؟؟ يعني هلأ لو بدي أشتري عصير ليمون طبيعي كم رح أدفع ؟ 10 ليرات ؟
  

 
على كل حال، الحمد لله إني ما فكرت اشتري “ضُمّة بقدونس” وخيارتين وشوية مخلل، يمكن والله أعلم كان دفعت 5 ليرات وانا مو مستوعب.
  

 
لا ليمون بعد اليوم.

 
 على فكرة: هاي مش صورتي انا بلبسش نضارة
  

 
كانت أول مرة أدخل فيها كوفي شوب جفرا..  وكان أول لقاء “ودّي” بيني وبين المخرج السينمائي “رفقي عساف” وكانت تالت  مرة أدخل فيها “وسط البلد” هاي السنة وكانت أول مرة أشرب فيها كاسة نسكافيه  تكلفني 130 دولار إلا كم سنت.
  

 
حكولي إنو الناس بتاخد “اللابتوبات” تاعونهم  معهم عالمقهى وانو في هناك “وايرلس” .. وايرلس في وسط البلد.. حلوة هاي..  المهم أخدت “اللاب توب” تاعي معي مشان اعرض على المخرج أول حلقة من مسلسل  كنت أنا وصاحبي “منذر” بنعمله.
  

 
طبعا أول القعدة طلبنا “مشروبات” يعني  نسكافيه على قهوة على أرجيلة، وقعدنا نحكي ونتعرف على المخرج أكتر وحكينا  وضحكنا ويا ريتنا ما ضحكنا، لسه بضحك أول ضحكة انا وبدي أضرب “كفّي بكفّ  المخرج” إلا إيدي خابطة بكاسة النسكافيه وما ألاقي إلا “اللاب توب” شرب كل  النسكافيه اللي كان في الكاسة.
  

 
انا شفت المنظر من هون، وخفّ ضبان عقلي من  هون، رحت بحركات سريعة نشفت الكيبورد تبع اللاب توب ونيّمته على بطنه نام  يا حبيبي نام.. مشان ينزل النسكافيه “الذي تشرَّبته الدوائر الالكترونية  التي تدخل في تركيب وصناعة أجهزة الكمبيوتر المحمولة”.
  

 
روّحت عالبيت واللاب توب لسه “نايم” على  بطنه.. اسمالله عليه.. “حطيته” عالمكتب وجبت “مفكّات” وشوية أشياء للصيانة  وقررت “أفكّه” وأنشفه وأزبطه.
  

 
كل “برغي” أفكّه حطيته بمكان آمن، برغي ورا  برغي.. بكل رقة ونعومة و fair and lovely .. أنا بصراحة كتير بخاف على  اللاب توب لإنو فيه كل شي.. وكل شي فيه مهم كتير، المهم عملت ورشة بغرفتي  وممنوع الدخول وهنا منطقة عمل ونأسف لإزعاجكم وكل شي إلو دخل بالعمل  الدقيق.
  

 
ساعتين أفك فيه.. وبعدين ما خلص “تفكيك”..  جبت سشوار وصرت أنشّف.. وريحة النسكافيه عبَّت الدنيا.. اجى ع بالي نسكافيه  بس والله منا شارب.. المهم أنشّف وأنضّف وبعدين رجعت ركّبت كل شي متل ما  كان بالزبط، وشغلته.
  

 
اللاب توب والله اشتغل.. وارتسمت على شفتاي  ابتسامة فرحة لما شفته اشتغل، بس للأسف الكيبورد ما اشتغل.. انا قلت سلك  فالت نسيت أركبه.. فكّيته مرة تانية وتأكدت انو كل شي راكب تمام. وشغّل يا  ولد.. مافي فايدة.
  

 
قلت الله بعين بودّيه على محل تصليح اللاب  توبات وبدفعلي 10 ليرات وأمري لله، دخلت عالمحل وأعطيت الزلمة اللاب توب،  أول ما أخده فكّ الكيبورد بحركة وحدة ومن غير ما يشيل ولا برغي.. الزلمة  طلع بروفيشنال عالآخر.. الزلمة ألقى نظرة على اللاب توب من جوا وعلى طول  حكالي: بدو تغيير كيبورد.. 95 ليرة .. يعني 130 دولار..
  

 
انا فكرت حالي مش سامع منيح.. حكتلو: معلش  شو حكيت؟ حكالي: 95 ليرة.. كنت بدي أحكيله 95 كندرة اللي يرموهم عليك وانتا  في مقابلة وقدامك جمهور كبير، بس سكتت.. مش احتراماً إلو لأ، بس الزلمة  كان “نص قُطُر” إيده تُعادل مقاس خصري على مرتين.. فقلت بلاش أتكسَّر أنا  واللاب توب سوا وأصير بدي 95 “قُطبة” بوجهي بالإضافة إلى الـ 95 ليرة حق  الكيبورد مع العلم إنو يمكن أخسر أشياء تانية مهمة بحياتي من ورا الضرب  اللي رح آكله.
  

 
خليته يغيّر الكيبورد ومديري في العمل دفعلي المبلغ لإني بستعمل اللاب توب في الشغل.. ما أحسنه.. بس يا رب ما يخصمهم من راتبي.
  

 
أنا البني آدم المسخَّم ومن منبري هذا أطالب  شركة نستلة بتعويض عطل وضرر بسبب اللي صار.. مشان يتعلموا يكتبوا على  كاسات النسكافيه تحذير: النسكافيه يمكن أن يتسبب في دفع ما قيمته 130 دولار  إذا انسكب على اللاب توب.